Կառավարության կողմից ներկայացված «Շարժական գույքի նկատմամբ ապահովված իրավունքների գրանցման մասին» և կից ներկայացրած օրենքների, նախագծերի փաթեթն առաջին ընթերցմամբ ընդունելու մասին հարցի քննարկման ժամանակ ելույթով հանդես եկավ Հայ ազգային կոնգրես խմբակցության պատգամավոր Գագիկ Ջհանգիրյանը:
«Ես ուզում եմ դիմել քաղաքական մեծամասնությանը, թե՛ Ազգային ժողովում, թե՛ Կառավարությունում, և մի այսպիսի, չասեմ զգուշություն, մի մտավախություն է հայտնվել, որ համաշխարհային ֆինանսական կենտրոնների աջակցությամբ, հատկապես լոբբինգ արվող և նաև նյութապես աջակցվող օրենքների, օրենսգրքերի հարցում, մենք բավական զգուշավորություն պետք է դրսևորենք: Գիտեք ինչ, եթե նրանք նախապես ունեն մշակված բալվանկաներ, մոդելներ և տասնյակ երկրներում դրանք արդեն այսպես հրամցված են լինում և նաև մեզ են հրամցնում, նաև շահագրգռում են մեր իշխանություններին, որպեսզի մենք այդ օրենքները ընդունենք հնարավորինս ձեռք չտալով սկզբունքային կետերին, խնդիրը վերաբերում է ոչ միայն այս օրենքին, այլ բազմաթիվ օրնեքներին, որոնք նախկինում են ընդունվել, նաև մի օրենք էլ ունենք «Անհատական տվյալների պաշտպանության մասին» էլի մեր օրակարգում, դրան էլ է վերաբերում, և մենք այստեղ պետք է չափազանց զգուշավոր լինենք: Եթե մեր անկախության սկզբնական տարիներին այդ օրենսդրական մոդելը կամ այդ աշխատաոճը գուցե նաև հասկանալի էր, ընդունելի էր, ասենք քրեական օրենսգրքի մոդել էին մշակում ԱՊՀ երկրների համար, քրեակատարողական այսպես զարգացած և կայուն օրենսդրական դաշտ ունենք, որպեսզի ձեռնպահ մնանք այսպիսի հրապուրանքներից, խայծերից ես կասեի: Հիմա, ինչ վերաբերում է այս օրենքին, ըստ էության այն կոշտ միջամտություն է մեր օրենսդրական դաշտ: Տիկին Հովհաննիսյանը ասեց, որ բավականաչափ աշխատել են, դիտողություններ են արել, ընդունել են, բայց ես կարծում եմ այստեղ դեռ անելիքներ որոշակի առումով կա, որովհետև նաև չներդրված ոլորտի կարգավորում է, ինքը բերելու է բազմաթիվ այնպիսի խնդիրների, որոնք այսօր չենք էլ կարող կանխատեսել: Ուստի լավ կլինի, որ առաջինից երկրորդ ընթերցում անպայմանորեն ներգրավվեն նաև քաղաքացիական իրավունքի, լայն առումով նեղ մասնագետներ, տարբեր ոլորտների, նույն՝ այդ թվում նաև ԵՊՀ համապատասխան ամբիոնի գործընկերները: Ես, բնականաբար, հատուկ պետք է կանգ առնեմ այդ քրեական օրենսգրքում առաջարկվող լրացման վրա: Գիտեք, ես հիմա չեմ ուզում կրկնել այն ինչ ասել եմ իմ հարցի ժամանակ, բայց խնդիրը կարգավորված է, հավատացեք ինձ, որպես քրեական իրավունքի ոլորտի շատ թե քիչ մասնագետի: Եթե խոսքը գնում է իր գույքի ոչնչացման մասին դա քրեորեն պատժելի կարող է լինել միայն այն պարագայում, եթե այդ ոչնչացման եղանակը հանրավտանգ է կամ այդ ոչնչացմամբ այլ քաղաքացիների կամ հասարակության իրավունքները կամ շահերը մենք ոտնահարում ենք: Հակառակ դեպքում, քրեորեն պատժելի ոչինչ չի կարող լինել դրա մեջ: Տվյալ պարագայում, ես հասկանում եմ խոսքը գնում է վարկային ծրագրով գնած կամ գնված մեքենայի, որը նաև հետո գրավ է դրվում այդ նույն բանկում, այդ մեքենայի, ասենք երկու տարի մեկ տարի վճարել է տոկոսադրույքները, հետո ինչ ինչ պատճառներով չի կարողացել, հիմա հսկայական փող է վճարել, թաքցնում են, հանում են այլ երկիր, վաճառում են պահեստամասերի ձևով կամ ներսում են այսպես քանդում ու վաճառում տարբեր մասերի, բայց դա ֆորմալ է իրենց գույքը, պարոն փոխնախարար, որովհետև ինքը նաև գրավ է դրված, այսինքն ինքը չի փոխհատուցել այդ գույքի ամբողջ արժեքը: Եթե փոխհատուցված լիներ, մենք ոչինչ էլ չէինք կարողանա անել: Հիմա ցանկացած քաղաքացի կարող է իր մեքենան տանել և սարից գլորել ցած: Եթե չկպչի որևէ հովիվի կամ մեկի կովը չսատկի դրա արդյունքում, ոչինչ չենք կարող ասել: Այսինքն այդ գույքը, ուղղակի ձևակերպված է նրա անունով, ոչ թե նրանն է: Դրա համար էլ կա նախաքննություն, մինչդատական վարույթ, որի ընթացքում պետք է ապացուցել, որ դա նրա գույքը չէ, ասենք 30 տոկոսով նրանը չէ, 60 տոկոսով նրանը չէ, հետևաբար նա չի կարող դա ոչ թաքցնել: Այսինքն այդ արարքները կարգավորված են 179, 185 ներկա գործող հոդվածներով, ավելին դուք այստեղ խոշոր չափից եք սկսում, իսկ այնտեղ զգալի չափով է սկսվում քրեական պատասխանատվությունը: Հետևաբար, ե կառաջարկեի, որ մենք իրականում լուրջ մշակեինք այս օրենքը և մեկ անգամ ևս հաշվի առնելով այսպիսի օրենքների, ինչ ասեմ, կարևորությունը և նաև վտանգավորությունը, շատ ավելի ուշադիր լինենք»:
Հայ Ազգային Կոնգրես
Ընտրարշավ
Պատկերասրահ
